ປະທານຜອດເທີໄປຢ້ຽມຢາມໂຮງໝໍເດັກແຫ່ງຊາດລະຫວ່າງການປະຕິບັດສາດສະໜ

ປະທານອົງການປະຖົມໄວສາມັນ ຊູແຊນ ເອັຈ ຜອດເທີ ໄດ້ມາຢ້ຽມຢາມອາຊີເປັນຄັ້ງທຳອິດໃນຊ່ວງທ້າຍເດືອນພຶດສະພາ 2025 ໂດຍເດີນທາງໄປປະຕິບັດສາດສະໜາກິດໃນຫົກສະຖານທີ່, ໂດຍສະເພາະແມ່ນຊຸມຊົນທີ່ ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍກຳລັງເຕີບໃຫຍ່ຂະຫຍາຍຕົວ. ຈຸດເດັ່ນຂອງການມາຢ້ຽມຢາມຂອງເພິ່ນນັ້ນກໍຄືໂຮງໝໍເດັກແຫ່ງຊາດ ແລະ ສູນສຸຂະພາບແມ່ ແລະ ເດັກ ໃນເມືອງພະນົມເປັນ, ປະເທດກຳປູເຈຍ ເພື່ອເບິ່ງຜົນກະທົບຂອງການຮ່ວມມືດ້ານມະນຸດສະທຳລະຫວ່າງເຂົາເຈົ້າກັບສາດສະໜາຈັກ.

ການຢ້ຽມຢາມໂຮງໝໍແຫ່ງຊາດ

ປະທານຜອດເທີ ພ້ອມດ້ວຍປະທານເຂດອາຊີ ແອວເດີ ເບັນຈາມິນ ເອັມ ຊີ ທາຍ ແລະ ນາໂອມີ ພັນລະຍາຂອງເພິ່ນ, ໄດ້ຮັບການຕ້ອນຮັບໂດຍຜູ້ອຳນວຍການໂຮງໝໍ ດຣ. ນິບ ອັງເກາະບອສ ແລະ ທີມງານຂອງເພິ່ນໃນວັນທີ 29 ເດືອນພຶດສະພາ, 2025. ພວກເພິ່ນໄດ້ຮັບຟັງການສະຫລຸບໂດຍຫຍໍ້ກ່ຽວກັບປະຫວັດຄວາມເປັນມາ ແລະ ການພັດທະນາ, ພ້ອມກັບຄວາມຕ້ອງການຕ່າງໆຂອງໂຮງໝໍດັ່ງກ່າວ, ແລະ ໄດ້ຮັບການນຳພາຢ້ຽມຊົມພະແນກຜ່າຕັດ, ຊຶ່ງສາດສະໜາຈັກໄດ້ໃຫ້ການບໍລິຈາກສະໜັບສະໜູນ.

ດຣ. ນິບ ໄດ້ເວົ້າວ່າ, “ການຮ່ວມມືລະຫວ່າງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ ແລະ ໂຮງໝໍເດັກແຫ່ງຊາດ ໄດ້ດຳເນີນມາຢ່າງຕໍ່ເນື່ອງເປັນເວລາຫ້າປີ. ສາດສະໜາຈັກໄດ້ຈັດຫາອຸປະກອນບາງຢ່າງສຳລັບການຜ່າຕັດ. ນີ້ເຮັດໃຫ້ໂຮງໝໍເດັກແຫ່ງຊາດສາມາດພັດທະນາດ້ານເຕັກນິກ ແລະ ດ້ານບໍລິການທີ່ສະໜອງໃຫ້ແກ່ເດັກນ້ອຍຂອງພວກເຮົາ...ເພື່ອການເບິ່ງແຍງທີ່ມີປະສິດທິພາບ ແລະ ມີຄຸນນະພາບສູງ.”

1 / 2

ดาวน์โหลดภาพ

ປະທານຜອດເທີໄດ້ຢ້ຽມຢາມສູນສຸຂະພາບແມ່ ແລະ ເດັກ, ຊຶ່ງໄດ້ຮ່ວມມືກັບສາດສະໜາຈັກນັບຕັ້ງແຕ່ປີ 2022. ຮອງຜູ້ອຳນວຍການ ດຣ. ເງັດ ຕິຢາ ນຳພາກຸ່ມເພື່ອຕ້ອນຮັບປະທານຜອດເທີ ແລະ ຍັງໄດ້ພາເພິ່ນຢ້ຽມຊົມຕຶກອາຄານໂຮງໝໍເພື່ອພົບປະກັບຄົນເຈັບ ແລະ ໄດ້ເຫັນການປັບປຸງປະຈຳວັນໃນຊີວິດຂອງພວກເຂົາ.

“ສູນສຸຂະພາບ ແລະ ສາດສະໜາຈັກແມ່ນມີເປົ້າໝາຍຄ້າຍຄືກັນ...ຄືເຮັດໃຫ້ຄົນເຈັບມີຄວາມສຸກ ແລະ ປິ່ນປົວພວກເຂົາເທົ່າທຽມກັນ, ຊຶ່ງເປັນເຫດຜົນທີ່ພວກເຮົາເຮັດວຽກຮ່ວມກັນເພື່ອເພີ່ມພູນຄຸນນະພາບຂອງການບໍລິການປິ່ນປົວຢູ່ທີ່ນີ້,” ດຣ. ເງັດໄດ້ກ່າວ “ບໍ່ພຽງແຕ່ໄດ້ຮັບອຸປະກອນທີ່ທັນສະໄໝເທົ່ານັ້ນ, ແຕ່ພວກເຮົາຍັງໄດ້ຮັບການຝຶກອົບຮົມຈາກທ່ານໝໍສະເພາະທາງ, ໃນສາຂາທີ່ຫລາກຫລາຍທີ່ເປັນອາສາສະໝັກມາຈາກ [ສາດສະໜາຈັກ] ນຳອີກ.” ທັກສະຄວາມສາມາດທີ່ເພີ່ມຂຶ້ນເຫລົ່ານີ້ໄດ້ສົ່ງຜົນໃຫ້ສູນສຸຂະພາບໄດ້ຮັບຄະແນນຄວາມພໍໃຈຈາກລູກຄ້າເຖິງ 94% ຈາກການສຳຫລວດຜ່ານມາທີ່ເຮັດຂຶ້ນມາໂດຍກະຊວງສາທາລະນະສຸກ.

ໂຄງການການຮັບໃຊ້ຂອງອົງການປະຖົມໄວ

1 / 2

ดาวน์โหลดภาพ

ຢູ່ທີ່ໂຮງໝໍ, ປະທານຜອດເທີໄດ້ມອບຊຸດເຄື່ອງຂຽນຈຳນວນ 200 ຊຸດທີ່ຖືກແພັກບັນຈຸເປັນພິເສດ ໃນມື້ກ່ອນ ໂດຍເດັກນ້ອຍໄພ່ພົນຍຸກສຸດທ້າຍໃນທ້ອງຖິ່ນ. ຊຸດອຸປະກອນທີ່ຄ້າຍຄືກັນນີ້ກໍໄດ້ຖືກກະກຽມໂດຍເດັກນ້ອຍປະຖົມໄວຈາກທ້ອງຖິ່ນອຸດອນ ປະເທດໄທ ມອບໃຫ້ກັບບ້ານພັກເດັກຍິງອຸດອນ ທານີ, ແລະ ຈາກສະເຕກໄຕ້ຈຸງ ໄຕ້ຫວັນ ຕາເວັນອອກ ມອບໃຫ້ກັບມູນນິທິໃຈບຸນຊິແຟັງເພື່ອການຊ່ວຍເຫລືອສັງຄົມສົງເຄາະ. ຄວາມພະຍາຍາມເຫລົ່ານີ້ເປັນການຕອບສະໜອງຕໍ່ແຜນລິເລີ່ມປີ 2025 ຂອງໂຄງການຮັບໃຊ້ປະຈຳປີຂອງອົງການປະຖົມໄວ ເພື່ອຊ່ວຍໃຫ້ເດັກໄດ້ຮັບໃຊ້ເດັກນ້ອຍຄົນອື່ນໆ.

“ຫົວໃຈຂອງເດັກນ້ອຍມີຄວາມອ່ອນໄຫວ ເມື່ອພວກເຂົາຄິດເຫັນເດັກນ້ອຍຜູ້ທີ່ຕ້ອງການຄວາມຊ່ວຍເຫລືອ ແລະ ຮູ້ວ່າພວກເຂົາສາມາດສ້າງຄວາມແຕກຕ່າງໄດ້,” ປະທານຜອດເທີໄດ້ກ່າວ. “ຂ້ອຍຢາກຊ່ວຍທຸກຄົນຢູ່ທີ່ໂຮງໝໍ ເພື່ອເຮັດໃຫ້ເຂົາເຈົ້າມີຄວາມສຸກ,” ເດັກຍິງ ພາດີ ຣິຢານຸດ ອາຍຸແປດປີ ຈາກທ້ອງຖິ່ນ ພະນົມເປັນຕາເວັນອອກ ກຳປູເຈຍ ໄດ້ກ່າວ. ໝູ່ຂອງນາງຄົນໜຶ່ງຊື່ ເຣັດ ເນມານເຕຍ, ຜູ້ທີ່ມີອາຍຸແປດປີຄືກັນ ກໍໄດ້ກ່າວຕື່ມວ່າ, “ຂ້ອຍຮູ້ສຶກດີໃຈທີ່ຂ້ອຍສາມາດເຮັດສິ່ງດີໆນີ້ໃຫ້ກັບພວກເຂົາ, ແລະ ຂ້ອຍກໍຫວັງວ່າພວກເຂົາຈະຍິນດີເຊັ່ນກັນ.”

ຂະນະທີ່ປະທານຜອດເທີໄດ້ແຈກຢາຍຖົງເຄື່ອງບໍລິຈາກໃຫ້ແຕ່ລະຄົນທີ່ບ້ານພັກເດັກຍິງອຸດອນ ທານີ, ເພິ່ນໄດ້ເບິ່ງເຂົ້າໄປໃນດວງຕາຂອງເດັກນ້ອຍທີ່ຮັບເອົາເຄື່ອງແຕ່ລະຄົນ ແລະ “ຫວັງວ່າໃນຊ່ວງເວລາສັ້ນໆຂອງການເບິ່ງເຂົ້າໄປໃນດວງຕາຂອງພວກເຂົານັ້ນຈະເຮັດໃຫ້ພວກເຂົາຮູ້ສຶກໄດ້ວ່າພຣະເຈົ້າຊົງຮັກ ແລະ ຮູ້ຈັກພວກເຂົາ.” “ພວກເຮົາຮັບໃຊ້ດ້ວຍຄວາມຮັກຕໍ່ພຣະເຈົ້າ, ແລະ ພວກເຮົາຮັບໃຊ້ຍ້ອນວ່າພວກເຮົາຮັກລູກໆຂອງພຣະອົງ,” ເພິ່ນໄດ້ກ່າວ.

ການປະຕິບັດສາດສະໜາກິດຕໍ່ສະມາຊິກ

1 / 2

ดาวน์โหลดภาพ

ສະມາຊິກຕ່າງກໍຮູ້ສຶກໄດ້ເຖິງສາຍຕາອັນດຽວກັນນີ້ ຊຶ່ງຫລາຍຄົນໄດ້ບອກວ່າເຂົາເຈົ້າສຳຜັດໄດ້ເຖິງຄວາມຮັກຂອງເພິ່ນທີ່ມີໃຫ້ເຂົາເຈົ້າ. ຂະນະທີ່ເພິ່ນກ່າວຂໍ້ຄວາມກ່ຽວກັບການຮັບໃຊ້ທີ່ເຕັມໄປດ້ວຍຄວາມຊື່ນຊົມ, ການອະທິຖານຢ່າງຈິງໃຈ, ແລະ ພອນຂອງພຣະວິຫານ, ປະທານຜອດເທີໄດ້ບອກກັບເຂົາເຈົ້າວ່າ, “ສິ່ງໜຶ່ງທີ່ຂ້າພະເຈົ້າຮູ້ສຶກພິເສດຫລາຍກັບພວກທ່ານແຕ່ລະຄົນ, ກໍຄືຂ້າພະເຈົ້າຮູ້ສຶກເຖິງຄວາມສຸກຈາກພວກທ່ານ. ນັ້ນເປັນຂອງຂວັນທາງວິນຍານທີ່ສວຍງາມ.”

ທີ່ປະເທດໄທ, ປະທານຜອດເທີຍັງໄດ້ປະຕິບັດສາດສະໜາກິດຕໍ່ສະມາຊິກຊາວມຽນມາທີ່ດຳລົງຊີວິດຢູ່ບາງກອກ ໃນລະຫວ່າງການເຕົ້າໂຮມເພື່ອສັງສັນໃນຄອບຄົວ. ອອງ ທູ ຈໍ ຈາກມຽນມາທີ່ເຂົ້າຮ່ວມໃນສະເຕກບາງກອກຕາເວັນຕົກ ປະເທດໄທ ໄດ້ກ່າວວ່າ, “ຫລັງຈາກການປະຊຸມ, ຂ້ອຍຮູ້ສຶກໄດ້ວ່າ ເຖິງແມ່ນພວກເຮົາຈະຢູ່ປະເທດໄທ, ທີ່ເປັນຕ່າງປະເທດ, ຂ້ອຍກໍບໍ່ໄດ້ໂດດດ່ຽວຕົວຄົນດຽວ. ຂ້ອຍມີໝູ່ເພື່ອນ ແລະ ສະມາຊິກທີ່ເປັນຄືກັບຄອບຄົວຢູ່ທີ່ນີ້, ແລະ ເຂົາເຈົ້າເຂົ້າມາໃນຊີວິດຂອງຂ້ອຍຫລາຍຂຶ້ນເລື້ອຍໆ.”

ທີ່ປະເທດລາວ, ຊຶ່ງເປັນປະເທດທີ່ມີພຽງແຕ່ສາຂາດຽວໃນນະຄອນຫລວງວຽງຈັນ ສະມາຊິກໄດ້ພາກັນອອກມາຈາກອາຄານປະຊຸມໂບດ ເພື່ອລຽນແຖວໂບກມືອຳລາ, ໃນຂະນະທີ່ລົດຂອງປະທານຜອດເທີກຳລັງຂັບເຄື່ອນອອກໄປ. ໃນກຸ່ມຂອງສະມາຊິກນີ້ ປະກອບດ້ວຍຄອບຄົວ ອິນທະວົງ ທີ່ເປັນສະມາຊິກສີ່ລຸ້ນຄົນ, ຜູ້ທີ່ຮັກສະມາຊິກໃໝ່ຂອງສາດສະໜາຈັກຄືກັນກັບຄົນໃນຄອບຄົວຂອງເຂົາເຈົ້າເອງ, ຊຶ່ງສົ່ງຜົນໃຫ້ມີອັດຕາການຮັກສາສະມາຊິກໃນສາຂາໄວ້ໄດ້ເກືອບ 100%.

“ຂ້ອຍຄາດຫວັງໄວ້ສູງຫລາຍ ເພາະວ່າຂ້ອຍຢາກເຫັນເພິ່ນແທ້ໆ,” ທ້າວວຸດທິສັກ ສີລິສຸກ ສະມາຊິກອາຍຸ 19 ປີໄດ້ກ່າວ “ເພິ່ນໄດ້ເວົ້າກ່ຽວກັບຊີວິດຂອງເພິ່ນໃນໄວຮຽນ, ຕອນນັ້ນທີ່ເພິ່ນເປັນສະມາຊິກພຽງຄົນດຽວ, ຊຶ່ງມັນເປັນເລື່ອງທີ່ຍາກ...ນັ້ນມີຄວາມໝາຍຫລາຍກັບຂ້ອຍ ເພາະວ່າຂ້ອຍກໍເປັນແບບນັ້ນຄືກັນ, ເປັນສະມາຊິກຄົນດຽວຢູ່ທີ່ໂຮງຮຽນຂອງຂ້ອຍ...ຂ້ອຍເຄີຍເປັນສະມາຊິກທີ່ອ່ອນແອ, ມັກຈະຖືກລໍ້ລວງໃນຫລາຍຮູບແບບ...ແຕ່ເມື່ອຫລັງຈາກທີ່ໄດ້ຟັງເພິ່ນເວົ້າ, ຂ້ອຍກໍຮູ້ສຶກໄດ້ວ່າ ຂ້ອຍຄວນທີ່ຈະພະຍາຍາມເຂັ້ມແຂງໃຫ້ໄດ້ດີກວ່ານີ້ ເພາະວ່າຂ້ອຍເປັນລູກຂອງພຣະເຈົ້າ.”

1 / 2

ดาวน์โหลดภาพ

ທີ່ປະເທດກຳປູເຈຍ, ປອນ ໂສປັນຫາ ອາຍຸ 16 ປີ ຈາກທ້ອງຖິ່ນສຽມລຽບ ກຳປູເຈຍ ໄດ້ກ່າວວ່າ, “ຕອນທີ່ຂ້ອຍໄດ້ຟັງສິ່ງທີ່ເພິ່ນສິດສອນ, ຂ້ອຍໄດ້ເລີ່ມທີ່ຈະປ່ຽນແປງຄວາມຄິດຂອງຂ້ອຍເອງ. ກ່ອນໜ້ານີ້, ຂ້ອຍບໍ່ເຂົ້າໃຈເຖິງສິ່ງທີ່ສຳຄັນຂອງການອະທິຖານ ຫລື ການອະທິຖານນັ້ນຊ່ວຍເຮົາແນວໃດແດ່. ແຕ່ຈາກສິ່ງທີ່ຂ້ອຍໄດ້ຮຽນຮູ້ຈາກເພິ່ນ, ຂ້ອຍໄດ້ຮູ້ຈັກວ່າເມື່ອເຮົາອະທິຖານ, ເຮົາຄວນທີ່ຈະທູນຂໍພຣະເຈົ້າດ້ວຍຄວາມຈິງໃຈ ແລະ ຈິງຈັງ.”

ແລະ ທີ່ປະເທດໄຕ້ຫວັນ, ປະທານຜອດເທີໄດ້ເຊື້ອເຊີນສະມາຊິກຈາກສະເຕກໃນໄຕ້ຈຸງທັງສາມແຫ່ງ ໃຫ້ພຣະເຈົ້າມາກ່ອນເປັນອັນດັບໜຶ່ງ ແລະ ສະແຫວງຫາພຣະຫັດຂອງພຣະອົງໃນຊີວິດຂອງເຂົາເຈົ້າ. ໃນລະຫວ່າງການຢ້ຽມຢາມທີ່ບໍ່ໄດ້ບອກລ່ວງໜ້າ, ໃນຕອນທ້າຍຂອງການປິດກອງປະຊຸມ YSA ແຫ່ງຊາດຂອງໄຕ້ຫວັນ ປະຈຳປີ 2025 ເພິ່ນຍັງໄດ້ຊຸກຍູ້ໃຫ້ຜູ້ໃຫຍ່ໜຸ່ມໂສດ (YSA) ໄປພຣະວິຫານເລື້ອຍໆ ເພື່ອສະແຫວງຫາອຳນາດຖານະປະໂລຫິດຂອງພຣະເຈົ້າ ເພື່ອເຮັດໃຫ້ເຂົາເຈົ້າເຂັ້ມແຂງຂຶ້ນ.

1 / 2

ดาวน์โหลดภาพ

ຜົນກະທົບຢ່າງຊອບພຣະໄທພຣະເຈົ້າ

ປະທານຜອດເທີໄດ້ເນັ້ນໜັກວ່າການສ້າງພຣະວິຫານເປັນ “ສັນຍານວ່າພຣະເຈົ້າຮູ້ວ່າ ສະມາຊິກເຫລົ່ານີ້ມີສັດທາຫລາຍພຽງໃດ ແລະ ວ່າເຂົາເຈົ້າຈະເປັນເຄື່ອງມືໃນການນຳເອົາອີກຫລາຍຕໍ່ຫລາຍຄົນມາສູ່ພຣະກິດຕິຄຸນ.” ເພິ່ນຍັງໄດ້ເວົ້າເຖິງການສ້າງພຣະວິຫານພະນົມເປັນ ກຳປູເຈຍ ທີ່ກຳລັງຖືກສ້າງຂຶ້ນຢູ່ກົງກັນຂ້າມກັບ ໂຮງໝໍເດັກແຫ່ງຊາດ ແລະ ຮັບຮອງການເຊື້ອເຊີນພະນັກງານໃຫ້ມາຮ່ວມງານເປີດທ່ຽວຊົມພຣະວິຫານ.

ໃນຊ່ວງການເດີນທາງເກົ້າວັນ, ປະທານຜອດເທີຍັງໄດ້ເຂົ້າຮ່ວມໃນລາຍການໃຫ້ຄຳດົນໃຈປະຖົມໄວ ສາມລາຍການ; ລາຍການໃຫ້ຄຳດົນໃຈສະມາຊິກທົ່ວໄປ ສາມລາຍການ; ການຝຶກອົບຮົມຜູ້ນຳສະຕີ ສາມລາຍການ ທີ່ກວມລວມເອົາ ປະຖົມໄວ, ຍິງໜຸ່ມ ແລະ ສະມາຄົມສະຕີສົງເຄາະ; ແລະ ການຢ້ຽມຢາມປະຖົມໄວ ຫລື ກຸ່ມຜູ້ນຳຈຸດສຸມ ສາມລາຍການ.

ປະທານຜອດເທີໄດ້ແບ່ງປັນວ່າ, “ຂ້າພະເຈົ້າຫວັງວ່າສະມາຊິກໃນເຂດອາຊີທີ່ກະແຈກກະຈາຍກັນຢູ່ທຸກແຫ່ງຈະໄດ້ຮັບຮູ້ວ່າພຣະເຈົ້າຊົງຄິດເຖິງພວກເຂົາ. ພວກເຂົາອາດຈະຮູ້ສຶກວ່າມີສະມາຊິກບໍ່ຫລາຍປານໃດໃນປະເທດຂອງພວກເຂົາ, ບາງທີພວກເຂົາອາດຈະເປັນສະມາຊິກພຽງຄົນດຽວຢູ່ທີ່ໂຮງຮຽນ ຫລື ບ່ອນເຮັດວຽກ. ແຕ່ວ່າພຣະເຈົ້າຮູ້ຈັກພວກເຂົາ, ພຣະອົງຮັກພວກເຂົາ, ແລະ ພວກເຂົາມີວຽກງານທີ່ສຳຄັນທີ່ຕ້ອງເຮັດໃຫ້ກັບພຣະອົງ...ພວກເຂົາເປັນລູກໆໃນພັນທະສັນຍາ...ແລະ ພວກເຂົາສາມາດເຮັດສິ່ງທີ່ຍິ່ງໃຫຍ່ ແລະ ການອັດສະຈັນໄດ້.”

ປະ​ທານ​ຜອດ​ເທີ​ໄປ​ຢ້ຽມ​ຢາມ​ໂຮງ​ໝໍ​ເດັກ​ແຫ່ງ​ຊາດ​ລະ​ຫວ່າງ​ການ​ປະ​ຕິ​ບັດ​ສາດ​ສະ​ໜາ​ກິດ​ໃນ​ອາ​ຊີ

ປະທານຜອດເທີໄປຢ້ຽມຢາມໂຮງໝໍເດັກແຫ່ງຊາດລະຫວ່າງການປະຕິບັດສາດສະໜາກິດໃນອາຊີ